हिताहितीयाध्यायः

श्लोक 3

यद्वायोः पथ्यं तत् पित्तस्यापथ्यमित्यनेन हेतुना न किञ्चिद्द्रव्यमेकान्तेन  हितमहितं वाऽस्तीति केचिदाचार्या ब्रुवते |
तत्तु न सम्यक्; इह खलु यस्माद्द्रव्याणि स्वभावतः  संयोगतश्चैकान्तहितान्येकान्ताहितानि हिताहितानि च भवन्ति ||३||

श्लोक 5

अतः सर्वप्राणिनामयमाहारार्थं वर्ग उपदिश्यते; तद्यथा- रक्तशालिषष्टिककङ्गुक्रमुकुन्दकपाण्डुकपीतकप्रमोदककालकास-नकपुष्पककर्दमकशकुनाहृतसुगन्धककलम-नीवारकोद्रवोद्दालकश्यामाकगोधूमयववैणवैणहरिणकुरङ्गमृगमातृका-श्वदंष्ट्राकरालक्रकरकपोतलावतित्तिरिकपिञ्जलवर्तीरवर्तिका  मुद्गवनमुद्गमकुष्ठकलायमसूरमङ्गल्यचणकहरेण्वाढकीसतीनाश्चिल्लिवा-स्तुकसुनिषण्णकजीवन्तीतण्डुलीयकमण्डूकपर्ण्यः, गव्यं घृतं, सैन्धवं,  दाडिमामलकमित्येष वर्गः सर्वप्राणिनां सामान्यतः पथ्यतमः ||५||

श्लोक 7

एकान्तहितान्येकान्ताहितानि तु प्रागुपदिष्टानि, हिताहितानि तु यद्वायोः  पथ्यं तत् पित्तस्यापथ्यमिति ||७||

श्लोक 9

रोगं सात्म्यं च देशं च कालं देहं च बुद्धिमान् |
अवेक्ष्याग्न्यादिकान् भावान् रोगवृत्तेः प्रयोजयेत् ||९||

श्लोक 13

अतोऽन्यान्यपि संयोगादहितानि वक्ष्यामः-नवविरूढधान्यैर्वसामधुपयोगुडमाषैर्वा ग्राम्यानूपौदकपिशितादीनि  नाभ्यवहरेत्; न पयोमधुभ्यां रोहिणीशाकं जातुकशाकं वाऽश्नीयात्,  बलाकां वारुणीकुल्माषाभ्यां, काकमाचीं पिप्पलीमरिचाभ्यां;  नाडीभङ्गशाककुक्कुटदधीनि च नैकध्यं; मधु चोष्णोदकानुपानं; पित्तेन  चाममांसानि; सुराकृशरापायसांश्च नैकध्यं; सौवीरकेण सह  तिलशष्कुलीं;  मत्स्यैः सहेक्षुविकारान्; गुडेन काकमाचीं, मधुना  मूलकं,  गुडेन वाराहं  मधुना च सह विरुद्धं; क्षीरेण मूलकम्,  आम्रजाम्बवश्वाविच्छूकरगोधाश्च;  सर्वांश्च मत्स्यान् पयसा, विशेषेण  चिलिचिमं; कदलीफलं तालफलेन  पयसा दध्ना तक्रेण वा; लकुचफलं  पयसा दध्ना माषसूपेन वा, प्राक् पयसः  पयसोऽन्ते वा ||१३||

श्लोक 15

अतो मानविरुद्धान् वक्ष्यामः-मध्वम्बुनी मधुसर्पिषी मानतस्तुल्ये नाश्नीयात्; स्नेहौ मधुस्नेहौ जलस्नेहौ वा  विशेषादान्तरीक्षोदकानुपानौ ||१५||

श्लोक 17

तरतमयोगयुक्तांश्च  भावानतिस्निग्धानतिरूक्षानत्युष्णानतिशीतानित्येवमादीन् विवर्जयेत् ||१७||

श्लोक 19

व्याधिमिन्द्रियदौर्बल्यं मरणं चाधिगच्छति |
विरुद्धरसवीर्याणि भुञ्जानोऽनात्मवान्नरः ||१९||

श्लोक 21

विरुद्धाशनजान् रोगान् प्रतिहन्ति विरेचनम् |
वमनं शमनं वाऽपि पूर्वं वा हितसेवनम् ||२१||

श्लोक 23-29

अथ वातगुणान् वक्ष्यामः-
पूर्वः समधुरः स्निग्धो लवणश्चैव मारुतः |
गुरुर्विदाहजननो रक्तपित्ताभिवर्धनः ||२३||

क्षतानां विषजुष्टानां व्रणिनः श्लेष्मलाश्च ये |
तेषामेव विशेषेण सदा रोगविवर्धनः ||२४||

वातलानां प्रशस्तश्च श्रान्तानां कफशोषिणाम् |
मधुरश्चाविदाही च कषायानुरसो लघुः |
दक्षिणो मारुतः श्रेष्ठश्चक्षुष्यो बलवर्धनः ||२५||

रक्तपित्तप्रशमनो न च वातप्रकोपणः |
विशदो रूक्षपरुषः खरः स्नेहबलापहः ||२६||

पश्चिमो मारुतस्तीक्ष्णः कफमेदोविशोषणः |
सद्यः प्राणक्षयकरः शोषणस्तु शरीरिणाम् ||२७||

उत्तरो मारुतः स्निग्धो मृदुर्मधुर एव च |
कषायानुरसः शीतो दोषाणां चाप्रकोपणः ||२८||

तस्माच्च प्रकृतिस्थानां क्लेदनो बलवर्धनः |
क्षीणक्षयविषार्तानां विशेषेण तु पूजितः ||२९||